Dichter-Literaten
Du und I zwoa Vorstadtstriezen
Dichter, meachtn gar vui sei
i selba buid mas manchmoi ei,
daß i vielleicht scho dichtn kannt
und boid wia Goethe waar bekannt.
Doch da feihts leider himmeweit
an Fantasie und Sinnlichkeit
und a de Sprach de der hat g'schriebn
is mir bis heut verborgn bliebn.
Und nimm i a an Schiller her
dann dua i mi genau so schwer.
An Friedrich und sein Freund Johann
da kummt so schnell hoit koana ran.
Es gibt welche unterdessen
de meachtn se mit dene messen,
san überheblich, überspannt
a wenns koa Mensch ned kennt im Land.
Doch gibt’s a oa, de wo was kenna
de kann ma a beim Nama nenna
des was de Welt liest, ham de gschriebn
und san trotzdem bescheidn bliebn;
ham kloane Schreiberling no kennt
und sie „per Du“ beim Nama g'nennt.
A so a Mensch der ned vermessen
bleibt stets verehrt und unvergessen.
Du und I zwoa Vorstadtstriezen
Mia warn zwoa, so wia vui andre
Lausbuam unsrer Münchner Stadt
ham erlebt wia München gwen is
nach'm Kriag wias ausgschaugt hat.
Unsre Leut ham ned vui Geld g'habt
warn hoit aus der Unterschicht,
grad aus dem Grund meacht i moana
sieght ma ois aus andrer Sicht.
Pflasterstoana vor de Häusa,
an de Hauswänd' weiße Pfeil,
im Keller drunt de Luftschutzschleusn
warn fia uns vom Leben a Teil.
Z'rissne Schuah und g'flickte Hosn
so hat unser Gwand ausgschaugt
und wenn wer a Radl g'habt hat
war des grad a so verhaut.
Nebn da Schui de Unterhaltung
war as Kino drent am Eck
und damit ma nei san kemma
ham ma Flaschn g'mobst um d'Wett.
Der wo des liest der kannt fast moana
das mia Freund warn und beinand
doch der irrt se ganz gewaltig
mia warn uns ganz unbekannt.
I z'Haidhausn, du in Giasing,
zwoa Jahr älter ois wia i,
doch, des is vollkommen gleich gwen
iwaroi war olles hi.
Kurz drauf kam die erste Liebe
Nama san heit Schall und Rauch
druntn in de Isarauen
hat ma g'streichlt ihr an Bauch.
Is ma na zum Tanzn ganga
mit am Hasn, Arm in Arm
is ma gstiegn ois wia a Gickal
und war trotzdem bettelarm.
Glangt hat's Geld grad fia a Hoibe
und an Schoppn mit vui Foam
umra zehne, wias valangt war
is ma na mitnanda hoam.
Ja, des warn de erstn Jahre
ärmlich zwar und trotzdem schee,
nur der wos wia mia erlebt hat
findts a heut no immer schee.
Später in der Sturm- und Drangzeit,
de ois Junga jeda hot,
san mia in da „Bergstubn“ g'sessn
oftmois ois a Zaungast grod.
Gwiß war des a hoaßes Pflaster
zwengs Zigeuner und GI's
oft is grafft wordn zwischen dene
doch war des fia uns nix Neu's.
Mia san drin gwen ned zum Raffa
d'Musi hat uns intressiert
und via unsan Gschmack vo domois
hat se de a ned blamiert.
Jitterbug und hoaße Rythmen
später no an Rock and Roi
des ham domois d'Leut gern hearn wion
und drum wars a immer voi.
Später na is Schwabing kemma
ja, woaß Gott wo warn mia drin
„Siegesgartn“, „Studio 15“ kemma
mir grad so in Sinn.
Doch auf oamoi hats an Blitz gebn
der hat eig'haut und mit Macht
und grad bis mas überschaugt hat
war ma g'heirat über Nacht.
Ganz schnei ham se Kinder eigstellt
weil se des hoit a so g'heart
und drum hat ma weida g'werklt
hat ned g'wußt was moi draus werd.
Doch schnell is de Zeit verganga
Schui- und Lehr- und Bergstubnzeit
und as Leben is a vaganga
ois Wimpernschlag da Ewigkeit.
Grad Haidhausn, Au und Giesing
und damit de Münchner Stadt
werd uns sicher überdauern
solang's soiche Kinder hat.
H.Hopper